終於當媽了！生產後記與黃金初乳
幾經辛苦終於將臭豬B帶左來呢個世界，生產時候既痛楚竟然俾臭豬B既降臨而掩蓋過，感覺真係好微妙，真係好開心好興奮，但同時亦好感動。。。因為，我終於成為 臭豬B 既媽媽啦！媽咪都好多謝臭豬B能夠降臨我地既家，為我地帶來喜悅！
臭豬B，你要記住呀，我地屋企每個人都會好愛錫你愛惜你架，你要健康快樂咁成長，咁樣爸爸媽媽就會好開心滿足架啦！
回顧：當臭豬B降臨既一刻，整個產房都再一次熱鬧起來，大家都好開心咁去迎接呢個小生命。。。助產使好好人咁俾我望左臭豬B一眼先再帶佢去簡單清潔，而我就要繼續努力 “痾” 埋個胎盤出來，助產使姐姐好好人，有用手幫我按肚等我可以更易完成呢個Last Step，攪掂之後就幫我檢查會陰，助產使姐姐話我做得好好，所以個會陰無撕裂，只係少少擦損，唔需要縫針，等自然癒合就好了，呢個moment真係要多謝 臭豬B，多得佢乖乖地我先唔駛挨縫針既痛。。。（抵錫 ）
當臭豬B抹乾身，而我又完晒啲檢查後，助產使姐姐就將 臭豬B交到我身上。。。個個Moment我真係有少少忍唔住想喊，因為我真係真係要做媽媽啦，個感覺比係之前臭豬B係我肚入面更強烈，實在太感動了！
助產使姐姐好好人咁同我地講話可以俾兩個鐘得地同BB係產房相處，但係助產使之後就話因為臭豬B之前照超聲波見到腸有光影，需要今晚去兒科留醫，要聽日先返來我身邊，個下聽完真係又有啲失落，所以更加珍惜呢個屬於我地一家三口既 “Our First Moment”，而助產使姐姐係離開產房之前亦主動話幫我地影張全家幅，呢張相就成為左我地一家既第一張既合照，特別有紀念價值。。。Anyways，Welcome to the World My Dear Babe。。。
因為BB 係肚入面個陣check到啲腸有光影既關係，所以當離開產房個陣我就要同BB短暫分開一晚。。。好記得當晚既心情，其實真係會有種莫名既失落。。。身邊床位既媽媽都有BB陪，而我就無。。。個陣真係有種說不出既悲傷，尤其係當我摸住個肚，已經感覺唔到同BB以前既個種親近，再加上被其他既BB喊聲圍繞著，真係有想喊既衝動感。。。
我好清楚知道坐月個陣喊係唔好既，所以就唯有忍住，乖乖地係床度休息，再同老公係wtsapp傾計。QM既姑娘好好人，佢地會教你點樣擠奶而唔日整痛自己，我發現呢個手勢都幾重要，因為當你損左唔啜得唔泵得個陣就大派用場啦！（因為BB唔係身邊未有得埋身住，只可以擠出儲落針通拎去兒科）
＊＊第一次擠出既母乳叫做 “黃金初乳” ，係最有益架＊＊
姑娘一路幫我擠一路覺得驚訝，仲讚我叻，因為一次過擠到15ml，姑娘話多數人未咁快上到奶，擠到5ml已經算好好，仲話估唔到我可以擠到15ml，其實聽完姑娘咁講真係加強左我對餵母乳既信心，知道原來自己都唔係咁渣豆，所以我更加要努力。
當我擠完奶無耐，又到左探病時間，老公、奶奶同媽咪都來左睇我。。。我第一時間唔係顧自己，反而係叫老公代我拎啲奶上去俾BB，（因為生完對腳無咩力，要去到當晚11,12點先可以落地磨住地咁行咋），老公上左成大半個鐘有多先返落來，而我都食飽飽，就係呢個時候，老公就拎出佢既手機，俾左好多佢岩岩係兒科度影既臭豬B相同影片俾我睇，一係唔睇，一睇又有啲眼濕濕，我仲同老公講我好掛住BB，老公就安慰我話：傻既，BB係兒科檢查之嘛，無事就會返來架啦嘛，你應該趁呢個時間休息下就真，唔係之後點照顧BB呀！
的確，老公講既都好岩，所以我都乖乖地咁休息，訓左一覺好既。。。（另外，亦要多謝老公支持我餵人奶 呢個都係我既動力之一）
到左第二日既10點零左右，姑娘推返BB來俾我啦終於，一見到BB個陣真係有一種講唔出口既喜悅。。。當然，我都把握時間去試下親餵，增加我同BB既相處時間，BB，請多多指教！大家都係新手，要高抬貴手呀！
Day 2 既臭豬B食飽飽就露出滿足既笑容，呢個笑容係媽咪最想見到同最鍾意既，多謝你呀，臭豬B！
今日係老公生日，咁岩就係採病時間前臭豬B返到我地身邊，唔通BB 早左出來真係為左同爸爸慶祝生日？我估應該都係，因為當老公幫BB換片片個陣BB整左個蛋糕俾爸爸呀！
老公／爸爸，生日快樂呀！（Btw，點解你個動作好似咁老積咁既？！）
Day 3既臭豬B今之食飽唔止係訓咁簡單，直頭係暈左。。。好啦，臭豬B，我地今日返屋企啦，以後你都要乖乖地呀，食多啲訓多啲又Bubu多啲，咁就快高長大架啦！
何謂”黃金初乳”？
“黃金初乳” 其實係指BB出生後頭幾天既母乳。因為初乳含有天然抗體、活免疫細胞、酵素等都可以幫BB增加免疫力，有助BB抵抗同預防疾病，另外，因為母乳有輕瀉作用，可以幫BB排出胎便，減低黃疸既機會添，所以真係可以話比起黃金更可貴架。
初乳份量雖然少，但足夠供給俾初生的BB，因為初生BB既胃其實好細，就好似一粒櫻桃咁！所以準媽媽們係唔需要太擔心架！
歡迎追蹤 小JM 既Fanspage 「傑。斯與晴」:
小JM既Facebook Page： 傑。斯 與 晴 （Jolie Babe。小JM の 成長印記）
延伸閱讀：高品質母乳有三多：初乳多、後乳多、營養多
關於作者與本篇文章
3個追蹤 傑。斯與晴
在職80後情人節媽媽與元宵節寶寶。
新手媽媽細數生活中點滴動人時光，
紀錄及分享育兒小心得、親子旅行及購物分享。
如果有任何查詢/合作想搵我或者Jolie，
歡迎去我們的FB專頁https://www.facebook.com/cjoliema0222/
又或者email到: [email protected]
我要回應