習俗解說：滿月不一定要"剃頭"！

誰說滿月就一定要剃頭？老一輩的長輩們每當有小B出世，就會千叮萬囑我們要為滿月既小B進行剃要儀式，長輩會話呢個儀式係「習俗」來，做左對小B會好啲咁話喎！其實信不信真係由你！而我同老公就選擇左「唔信」！點解？不如一齊了解一下「剃頭」既意思啦！

依照老一輩既說法，新生小B們係滿月當日係需要「剃頭」，要剃除胎髮（即係出世已經有既頭髮）。其實當中意義只係想為小B除去穢氣，及希望剃頭之後小B再生出來既頭髮會更濃密亮麗。另外，仲會為小B留起剃出既頭髮，以用作製作「胎毛筆」之用，以祈求小B會聰明伶俐，讀書精叻之喻意。

題外話：「胎毛筆」既起源發典故

「胎毛筆」起源於約一千五百年前既南朝時代，起初只是朝廷用來褒獎忠義學優既人，但到左唐宋年代，「胎毛筆」就轉變為書香門第既象徵。相傳，唐代有位窮書生以胎毛筆上京赴考仲高中狀元添，因此胎毛筆又有狀元筆之稱，據說代代相傳能帶來幸運。

我曾經係小B返健康院檢查既時候問過姑娘，「到底小B駛唔駛剃頭呢？」當時姑娘既解說令我同老公更清楚知道「剃頭」其實就只不過一種「習俗」而已，對小B無真正用處，反之卻有機會誤傷小B添！所以我地堅決咁向長輩們Say “NO！”

點解唔好「剃頭」？姑娘解釋話係由於小B們既頭皮比較薄，容易係剃頭時造成對毛囊既刺激不均勻而引起剃頭之後頭髮增長速度不一既現象。而且因為小B們主要都係長時間訓覺，所以對頭皮壓迫時間相對長，因而引致後尾枕頭髮容易脫落及生長緩慢。但呢個情況係正常既，與缺鈣無太大關係，所以爸爸媽媽們唔需要太擔心。另外，姑娘亦提醒諸爸爸媽媽們即使要小B們跟隨習俗「剃頭」，亦可以剪短頭髮來代替，盡量唔好剃光，以免毛囊受損，到時就得不償失架啦！

「剃頭」也有害？剃頭既習俗雖然說可以令小B們新長出來既頭髮更濃密亮麗，但呢一點一啲科學根據都無。但反之剃頭不當卻會為小B帶來傷害，影響深遠，所以爸爸媽媽們要小心處理！

1.）影響小B既散熱功能

頭髮本身具有散熱同溫度調節既功能，如果幫小B剃頭既話就會減低左本身既散熱作用再者，如果小B頭部曝露係陽光底下亦會較易引致曬傷既可能。

2.）容易造成對頭皮既傷害，增加細菌感染的機會

因為小B們既皮膚比較幼嫩，剃頭既時候會容易傷害到頭皮或毛囊組織，容易令小B感染細菌或增加皮膚問題等情況。再者，因為小B頭骨同神經系統尚未發育完整，如果剃頭既話真係要好小心，以免誤傷及頭骨及神經系統。

3.）減低對頭部既保護

頭髮有助保護及減低小B們頭部撞擊或受傷時既損害。

如果爸爸媽媽依然想幫小B剃頭既話，就要小心注意工具既清潔，同時唔好幫小B剃得太貼，可以幫小B剪短啲頭髮都係一樣架。「剃頭」其實只係一種習俗，同小B頭髮多與少、濃密與否並無實質關係，最緊要小B開心健康成長先係最重要！
【傑。斯與晴】授權轉載原文出處【C。J の爸媽手記。習俗解說。頭不一定要”剃”！】

延伸閱讀：成長禮俗第一關！剃頭做膽一起來