【放電好去處】源自芬蘭。逾萬呎免費歷奇公園 x 親子鞦韆 x 3.5米超高滑梯

之前都有同大家介紹過葵芳新都會廣場平台，有一個免費戶外兒童遊樂場。最近，呢個兒童遊樂場升級咗做歷奇公園，佔地逾萬呎，而且仲係免費入場嘅添!! 嚟梗7月31日，正式對外開放啦~~

遊樂設施仲係源自芬蘭，玩味十足!! 有6.5米高大型遊樂設施，3.5米超高戶外遊樂場滑梯，仲有第一次見到嘅親子鞦韆呢。

遊戲設施亦適合幼兒、小童及大人。

【親子鞦韆】

首次見嘅親子鞦韆，和牛B玩得超開心，仲玩咗好多次。

親子鞦韆可以同時容納1位大人、1位小童及兩位幼兒~

【6.5米高大型遊樂設施】

有繩網陣、攀爬繩，可以鍛鍊小朋友嘅手腳肌肉。

全方位多角度，每一處都有得玩。滑梯都有好多條，長度都有好多種。

茄子嘅滑梯~

3.5米高嘅水管滑梯~和牛B唔敢挑戰，唯有爸爸嚟挑戰啦~

【新式氹氹轉】

仲有好多新款氹氹轉玩~~

^樹葉氹氹轉

三人版氹氹轉，仲會左右傾斜添~~

五人氹氹轉，4個座位，再加上一個企位~~

超好玩嘅旋轉青蛙，可以訓練小朋友嘅平衡力呀~

【樂器敲擊】

兩座敲擊樂器，可以俾小朋友發揮音樂天份。可以打鼓、玩豎琴狀嘅樂器。

檸檬樹，俾充滿好奇心嘅小朋友捐來捐去~

【親子健身區】

引入英國最新設計嘅遊樂場健身運動設施，邊做運動仲可以邊為手機充電~

設卧式、手部及動感單車。

就連USB充電線都有得借用，仲可以用wifi 45分鐘上網。

**不過，想要將手機到100%電，真係加把勁啦~~我好努力都踩唔上最高點(哈)

而戶外公園仲有洗手位、飲水機。

【限定。低碳生活農墟市集】

而空中花園仲有限定活動，由即日至8月26日(逢星期六、日)都會舉行，低碳生活農墟市集。

而市集以健康、天然、手工成主打。

仲有種植唔少綠色植物、蔬菜、花等。

^ 本地種植嘅茄子。

^ 本地種植嘅檸檬。

^ 仲有導賞團，可以了解更多種植、植物嘅知識。

^ 煮食常用嘅九層塔

導賞員仲送我香蜂草，可以返去種植添呀~