首頁 » 作家投稿 » 生活放輕鬆 » 【購物日誌】牛棚新居之淘寶飯台 + 吊燈 *開箱文*

【購物日誌】牛棚新居之淘寶飯台 + 吊燈 *開箱文*

和牛b媽媽  更新於 2018-01-31 
看留言討論

FavoriteLoading收藏文章

網購我最常去嘅絕對係淘寶，成日都有一句說話掛喺口邊「一切盡在淘寶」，淘寶嘅世界乜都有。當然啦~淘寶貨唔係一定全部係劣質嘅，所以每次購物前，除咗我會睇價錢之外，都會睇下賣家係咪皇冠級、想買嘅貨物有冇買家留好評/ 點解負評先再決定買定唔買嘅。
 
今次因為搬新屋，我係大屋搬細屋嘅~所以我都有唔少嘢喺淘寶買落嚟，由細小嘅收納用品至到傢私(飯台)、燈我都有買返嚟，伏同埋唔伏嘅都有。
 
而呢一篇我就重點分享返我淘返嚟嘅吊燈、飯台啦。
 
分享咗好物先，就係和牛B間房嘅燈，充滿童趣嘅房燈。佢同我一樣，好鍾意動物，所以我為佢揀咗一盞簡單得嚟，又好有趣嘅動物燈。
 

 
簡潔嘅燈可以好襟興，而且容易清潔打理，方便換燈膽都好重要。我哋揀嘅呢個動物款，我見香港都有，不過香港貴差唔多10倍價錢，而我淘寶價RMB¥286 (未包運費)。價錢平一大截，所以我就大膽地冒個險淘咗返嚟啦。
 

 
呢個款有3頭、4頭、5頭，但和牛B間房唔係好大，所以我哋揀左3頭款嘅吊燈，已經好夠光。
 
評價: ★★★★★ (5星為滿分)
發貨速度 + 物流快、實物同相片一樣、無色差、無走樣、無臭味、價錢超值呀。
 
運費: 
由於我唔想經過集運又繁複、冒住被整爛、又耐嘅過程序。所以我就順豐到付運費直送香港，超級的快，我諗只係2日就送到我手，運費大概HKD68左右。
 
小貼士: 
淘寶買燈之前，最好問清楚賣家，香港係咪可以用得到。因為例如LED燈咁，有啲店出售嘅LED燈香港未必用得到o架，所以買之前記得同賣家溝通清楚先呀。
 
同埋，淘寶買燈當然安裝服務就包唔到俾你，要自己/ 裝修師傅幫手安裝埋啦。
 
 【淘寶天貓店】
 
淘寶飯台
點解我會決定喺淘寶淘張飯台返嚟呢? 原因係我想搵一張小巧得嚟又可以收納餐椅、又可以變大嘅飯台。
 
可以話呢啲台好普通啫香港都有啦，但我嫌香港有得買嘅款式當收納餐椅之後，外型好唔靚，所以我就上淘寶睇。於是就俾我見到佢啦，仲有我鍾意嘅粉紅色，可以襯返開放式廚房嘅粉紅色嘅雲石台。
 

 
一套一張摺疊餐台配四張餐椅RMB¥328 (大概HKD400)未計運費。
 
重點四張櫈用完之後，可以放返入飯台底到，而唔會影響外觀。淘寶店分享嘅實物圖，如果櫈唔收納返入台底，仲可以多個儲物空間添。
 
所以我終極冒咗個險淘咗佢返嚟，同樣我都係選擇直接送落香港，原因一樣。運費HKD457，所以成張台都係HKD857，都仲平過香港買嘅款。
 

唔打開兩邊摺疊嘅板，收埋晒尺寸只有60cm x 40cm，超級慳位!!
 
評價: ★★★☆☆ (5星為滿分) 其實我想俾3.5分
– 整體顏色無色差，我鍾意嘅顏色，外型同電腦睇嘅一樣
– 無臭味
– 配備足夠嘅螺絲及螺絲批
 
– 每一層層板都有保護膠包住

– 附有一張彩色印刷嘅組件圖

– 配件有用透明袋入住，不過可能運送過程太多碰撞，所以撞到散晒，要慢慢執返齊

– 唔滿意嘅地方係，我買之前已經同賣家講明要包裝得好啲，因為送香港好遠，驚件貨會爛。結果嚟到，包裝非常之求其，好彩配件冇缺少到。

 

– 台面一角爛咗一小角

 
– 台、櫈嘅角位真係好尖，所以我之前需要額外買3M保護膠再包邊
– 六角螺絲竟然有一粒係密窿，好彩都有配備Spare零件，否則我要去五金舖到配。

– 配件與配件之間嘅裝崁嘅對點，唔一致…所以要兩個人一齊合力先可以砌好張台。

砌好咗4張櫈，櫈面剛好俾一個體型中等嘅成年人坐。

摺疊台打開晒之後，120cm長，都足夠8-10個大人圍埋打邊爐食飯呀。

【淘寶飯台購買連結】
 
今次介紹嘅產品，大家覺得點呢? 張飯台係伏定係唔伏，就睇你點睇。雖然上面我有彈，但係我係鍾意張台嘅，因為佢外型靚，所以其他唔好嘅嘢，我會忘記咗佢

————————————————–
歡迎聯絡我&和牛B: [email protected]
Facebook專頁: 和牛B嘅成長專頁

Instagram: wagyubmami

 

 

 

 

 

 

 

 

 

 

 

 


————————————————–
姊妹合作**Precious M accessories**
利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。

關於作者與本篇文章

和牛b媽媽

在職媽媽，分享我的育兒心得、幼兒食譜、假日好去處。喜歡假日帶著和牛b四處遊玩，讀萬本書不如行萬里路。

看作者所有文章

我要回應

我要留言

推薦閱讀