【食譜】台式麻油煎麵線
作者＼孖B港媽
港媽啱啱返完香港，一拖二，真係攰到甩晒碌，成個人散晒，今日偷懶唔去街市買餸，孖B嘅Lunch見屋企有咩整咩。煎麵線好簡單，仲可以加蔬菜一齊煎，啱晒唔鍾意食菜嘅小朋友，營養滿分！
材料：
麵線 1.5個
蛋 1隻
蔬菜 （如紅蘿蔔、葉菜、南瓜、蕃薯等…） 適量
推薦閱讀：【食譜】南瓜飯￤一飯兩食
做法：
1. 麵線滾水落，變軟要立即撈起。
2. 麵線滰乾水，加入些少麻油拌勻，防止黐埋一舊。
3. 雞蛋加入豉油同胡椒粉調味，打散備用。
4. 將蛋汁加入麵線內，拌至所有麵線都沾有蛋汁。
5. 燒熱隻鑊，溫度唔洗太高，加入麻油抹勻。
6. 加入麵線，鋪平，用中（小）火煎至兩面金黃即可。
港媽貼士
- 1歲以下嘅BB都可以食用，唔落調味就可以，記得試新食物之前，確認對以上材料無敏感至好試呀！
- 港媽今次用咗台灣嘅麻油，整麻油雞嗰隻，深色啲，香啲，台灣人叫我哋平時用嘅麻油做香油。
- 如果要加入其他蔬菜要先處理，切幼絲然後略煮，或蒸熟壓成泥，再加入蛋汁內拌勻，最後加入麵線內。
推薦閱讀：【幼兒飲食】教孩子好好吃一頓飯
我要回應