有用嘅興趣班？

上星期送寶貝女去學跳舞，搭電梯嘅時候聽到兩個媽媽嘅對話。

媽A：你諗住幫囡囡（3歲左右）報Jazz定Ballet呀？
媽B：梗係報Ballet啦～有用啲呀嘛！可以考試！

其實，咩叫有用？考完試有張cert，就會令個興趣變得好有用嗎？冇得考試嗰啲就冇用？

上興趣班除咗學習一樣活動／技能之外，有好多品格建立嘅機會，更值得我哋去留意同珍惜。以學習跳舞或者樂器為例，當中唔少得有耐性地重複練習，小朋友能夠唔怕悶，為左喜歡嘅活動培養到呢種堅持，唔係更加難能可貴嗎？

如果有機會表演，將自己努力練習嘅成果自信嘅喺舞台上發揮，呢一份自信，會唔會比起一張cert，更能夠喺interview入面爭取更佳表現？

能夠喺課堂上認識新朋友，增加溝通，如果用英文上堂仲可以當埋英文play group，喺學習有興趣嘅活動之餘又可以加強溝通、人際關係，一舉多得，又有cert可以證明嗎？

課外活動嘅好處，其實仲有好多、好多，而且希晴媽媽相信，每件事都唔係咁單一，父母嘅焦點喺邊，自然小朋友就會有相同嘅焦點，爸爸媽媽們，你哋嘅眼光，有投放喺正確嘅地方嗎？

2個追蹤

最愛同媽媽們討論同分享教養心得，交流小朋友嘅happy school life，當然唔少得呢個shopaholic媽媽嘅shopping好介紹啦~

大家都在討論