【二寶孕記】妊娠糖尿測試之飲糖水 (一)

其實妊娠糖尿又會有咩影響呢？

其實妊娠糖尿對孕婦同埋BB都係有危險，如果血糖控制得唔好。可能會導致胎兒過大，令生產出現困難，甚至難產，或需提早剖腹生產；同時亦會增加畸胎、胎死腹中、羊水過多、早產等風險。

而BB出生時受感染和出現黃疸嘅機會亦都會增加，亦有呼吸窘迫症及「血糖過低」嘅危險，日後長大亦有較高機會患上糖尿病及心血管疾病…

不過，就算唔好彩患上咗妊娠糖尿，都唔需要太擔心。因為一般可以透過飲食嚟控制，少食多餐，少糖鹽、少芡汁、少煎炸為主，又或者依營養師嘅建議分配食物種類及控制分量，適當選用澱粉質、水果及奶類食物，以吸收足夠而均衡的營養。同時配合簡單運動如散步、游泳等來控制病情。

如果嚴重嘅話，醫生或會建議孕婦注射胰島素嚟穩定血糖…

而妊娠糖尿多數都係暫時性嘅，大部分媽媽生完BB之後，血糖水平都會回復正常。不過，曾經患上妊娠糖尿嘅媽媽，日後患上糖尿病嘅機會都會相對較高。

所以，產後都要繼續注意日常嘅飲食習慣及體重控制，同埋每年都要做檢查，check住啲血糖呀!!