【媽咪二次懷孕13W】第一次及第二次健康院產檢及到公立醫院做唐氏前期篩選！

今次主要分享我兩胎的政府產檢體驗，同埋我的懷孕經驗分享比各位孕媽咪！

我第一胎好好彩被助產士揀中可以喺威院做產檢，所以由第一次登記到生BB都唔洗去健康院做檢查，不過今次無依個機會啦，所以我都要同各位孕媽咪一樣健康院做產檢。

今次第二胎，由經期計算的預產期同超聲波結果偏差咗一星期，所以我想有再準確的預產期先去預約健康院。預產期小知識：唔少孕媽咪的預產期會隨著胎兒長大，照超聲波時發現開始出現偏差，無論係提前或延後。之前我都問過助產士，如果預產期差異有一星期以上，就記得要通知分娩的醫院或者健康院，因為入院紙有機會有改期嫁！

相信去健康院產檢大家都會聯想一件事「等好耐都未走得！！」我第一次預約是早上9點15分，不過我知道大概半小時前已可登記，所以我都提前咗。

第一次健康院產檢，登記後就馬上驗尿，磅重同量血壓，好快我已經見姑娘做初步諮詢，之後就再等醫生檢查同聽BB心跳，最後驗血都好快搞掂，只是無諗到等姑娘比預約紙等咗一個鐘有多，再加上最後等拎孕婦維他命等咗半小時有多，最後要去到12點半先走得！

不過最開心係健康院門口拿到一堆初生禮物！第一次完成健康院檢查，基本上姑娘態度都好好，而且好耐無做過產檢，所以我都有少少懷念嫁！

第二次健康院產檢就更加快到不得了，第二次預約時間係8:45，我8點30去咗登記，宜家正值肺炎好嚴重，所以一上到去就馬上量體溫，之後都係驗尿，磅重同量血壓，再等見姑娘加聽BB心跳，結果.. 我9:15就已經走得，比我想像中用少好多時間添！不過可能真係太早，所以我完全見唔到門口有一堆奶粉商的申請姨姨踪影！