【媽咪二次懷孕30W】 陀男陀女大不同？！

外觀上有咩分別？！同你細說我的身形變化！

第一胎陀仔 – 33週時相片

第二胎陀女28週個肚已經大過第一胎33週

我第一胎陀仔，整體身形係好瘦，基本上只有肚大，「標準肥B唔肥媽模式」，感覺好輕型；

第二胎陀女，我身形膨脤得好快，個肚大得仲快，由四個月開始我眼觀肚圍好似大咗三星期咁，孕中期開始肚圍直頭大咗一個月咁，不過大家唔好以為我今胎食多咗嘢好開胃，相反我到五個月中期先開始胃口好返啲，叫做正常返！另外隨住肚圍漸大，我條腰好快都唔見咗，而其他部位好似手臂同上背部都變得粗壯，整體愈來愈唔似本身身形！

單從外觀睇，陀仔陀女係我身上已經差好遠！

外觀上有咩分別？！同你細說我的皮膚變化！

我聽唔少孕媽咪講陀囡皮膚會好好，相反陀仔就麻麻；只不過我岩岩相反，陀仔皮膚好好，唔搽嘢都有層白滑光澤感，皮膚完全唔會暗淡；相反今胎陀女，由懷孕兩個月起我皮膚開始出現敏感甩皮同紅腫，而且係㾗到不得了！位置多數係眼窩位同耳仔背，到宜家七個月我耳仔背仲嚴重咗！所以疫症期間連帶口罩掂到耳背都好唔舒服，而我之前去健康院覆診問過醫生表示多數係荷爾蒙變化影響，現階段沒辦法搽任何去紅腫藥膏，只能夠用止㾗藥膏解決.. 不過搽完仲㾗咗，所以我搽咗一兩次就無用，希望好似醫生講懷孕後會自動消失啦！

單睇皮膚變化，陀仔陀女係我身上都有好大分別！

懷孕習慣有咩分別？！我的胃口變化！

首先無論陀仔定陀女，我的孕吐都係好嚴重，兩胎胃口一樣由係第五至第六個月開始正常少少。胃口方面，我第一胎陀仔特別鍾意食牛肉，仲有茶記早餐，同煎炸嘢食！

而第二胎陀女，我一開始都想食煎炸嘢，不過之後隠約感覺到想食甜嘢同重味嘢，所以當時我已經覺得自己今胎似陀女，記得係專頁有位媽咪inbox我，佢係二胎媽咪想知仔定女，我都分享返我口味變化分別比佢參考！！

食嘢口味唔同對我嚟講唔係太大問題，只係單純煮嘢買餸會辛苦啲，不過今胎鍾意食甜嘢同重味嘢，又孕吐嚴重唔想飲水之下，我已經踏入妊娠糖尿臨界點，不過好在發現得早，再慢慢調整返正常！

以上不科學分析只係我既小小分享，我知有好多媽咪陀兩胎性别一樣既bb，都有機會出現好似我上面咁既變化差異呢！！！