【沖繩親子自駕遊】兒童王國公園 x 睇動物 x 玩機動遊戲 (Part I)

收藏文章

嚟到第4日嘅行程，就係去動物園啦~帶住超級期待嘅心情嚟到。

我哋無行到高速公路，沿途見到嘅街道全部都好TOMICA，好新鮮!! 唔係大城市Feel，對我嚟講呢到係好特別。

沿途仲會經過Aeon Mall

兒童王國公園亦有提供免費泊車，露天停車場亦算大，我影唔晒呀。

泊好車後，可選擇行樓梯或搭升降機到兒童王國公門正門口購買門票。

入場費

以一個動物園嚟講，入場費一啲都唔貴。入面有大象、長頸鹿、獅子、老虎、馬騮等。個人覺得呢到係香港動植物公園嘅進階版，亦有荔園嘅感覺。

成人: ¥500 (約HKD35)

中、高學生 (13-18歲): ¥200 (約HKD14)

小學生 (4-12歲): ¥100 (約HKD7)

幼兒 (3歲或以下): 免費

至於開放時間，如果大家有睇篇關於海洋博公園．美麗海水族館都會發現，沖繩好多時會分夏季同冬季時間。所以出遊嘅時間，記得要留意清楚時間呀。

夏季時間 (4~9月)	冬季時間 (10~3月)	休息日
9:30am – 6pm	9:30am –5:30pm	逢星期二

動物園區

第一次咁近距離睇蝙蝠，原來佢哋都係食生果嘅。

仲有兩棲類動物可以觀賞。

再往前行，就會見到幾個獸籠，原來有好幾種馬騮喺入面到住。不過每個品種，都係好孤單咁喺個籠入面。

睇完馬騮仔，再睇下小鹿斑比先~~

梅花鹿真係好靚呀，真係好似小鹿斑比呀。

仲有羊群，一陣羊羶味~~

去動物園估唔到會見到狗仔~狗仔都係其中一隻住喺動物園被遊客觀賞嘅動物~

呢隻鴨類嘅動物，超似中國古代繡喺手巾仔上面嘅鴛鴦呢!!!

離開以上區域，再向前走會見到袋鼠。不過有雙層嘅欄同埋籠擋住，所以睇得唔係太清楚。

另外，動物園仲有一個活動室，可以俾遊客入場摸下接觸下小動物。例如兔子、小雞、倉鼠等，每節大約10分鐘。入場後記得聽從職員指示，亦唔好傷害小動物呀。

然後，我哋搭升降機去到猛獸園區，有長頸鹿、大象、獅子、老虎等。

和牛B第一次見到小象，仲要見到小象小便同埋大便。然後，和牛B個腦海就淨係記住大象屙Vee。

再行前啲就見到大象，真係好大呀!! 高過一個成年人，好壯觀!!

嗯! 日本人真係好細心，特登做咗一個警告牌，提遊客唔好越過圍欄，會被大象踩死。

長頸鹿唔知幾時喺和牛B心目中都佔咗啲地位，所以當和牛B見到真嘅長頸鹿佢又係好開心，睇到唔捨得走。

猛獸出沒注意!!!

獅子同老虎，不過我覺得佢哋無乜生氣，好似好攰無晒精力咁。

和牛B指住老虎話「媽咪，貓呀!」哈哈~咁大隻貓?!!

瞓到反轉晒嘅獅子。

離開猛獸區，再次回到動物區及機動遊戲區，途中近距離遇到馬仔。

馬仔平時可以試騎，可以騎馬於馬場內走一圈。每次¥500 (約HKD35)

機動遊戲區

呢到有三款唔同嘅機動遊戲，全部都適合一家大細。有小火車、電動車、旋轉木馬，而且價錢仲超抵。

電動車 ¥100 (約HKD7)

小火車 ¥200 (約HKD14)

旋轉木馬 ¥200 (約HKD14)

購票方法都好方便，收紙幣亦收硬幣。

買到遊戲券之後，彖遊戲券交俾職員就可以入去玩了。

小火車會圍住電動車區遊走大約兩圈左右就會回到火車站。唔知點解，我諗起Thomas & Friends。真係好似，可能因為火車隻色。

旋轉木馬大約轉兩、三個圈就完~人物都是以野生動物為主。

電動車，每架車都係小朋友最愛嘅款式嚟。不過時間關係，公園就快要休館，所以玩唔到了。

育嬰室/母乳餵哺室

兒童王國公園亦設有育嬰室/母乳餵哺室，空間亦足夠3個家庭。

亦非常窩心，房內設有兩張BB床。

租用嬰兒車如果冇帶到BB車嚟都唔需要擔心，因為呢到有提供租BB車服務。只要¥100 (約HKD7) 就可以租賃BB於公園內使用。

其實兒童王國公園，最好玩係除左有動物睇之外，喺正門一入就有一個名為「神奇博物館」(Wonder Museum)嘅館，係另外收費嘅。但係當你入咗去，大人細路都會唔捨得走~~~因為真係超好玩!!! 佢好似科學館咁，但係每一樣野都好好玩，好新奇!!

下一篇，再同大家分享館入面嘅事物啦~

兒童王國公園的地圖

沖繩兒童王國公園

地址：〒904-0021 沖縄県沖繩市胡屋 5-7-1
網址：http://www.kodomo.city.okinawa.okinawa.jp

Facebook：https://www.facebook.com/okinawakodomonokuni/

＜行程 + 景點＞

【沖繩親子自駕遊】海洋博公園 x 邊睇鯨鯊邊食晏 x 鯊魚館 Part III【沖繩親子自駕遊】海洋博公園 x 海豚表演 x 好多海龜 x放電公園 (Part II)
【沖繩親子自駕遊】海洋博公園 x 美麗海水族館 x 好多魚&鯨鯊呀!! (Part I)
【沖繩親子自駕遊】親子齊玩 x 裝飾好味雪糕 x 少女味 @ Blue Seal x Ice Park
【沖繩親子自駕遊】TomiTon 醫肚+放電+購物 & 森林家族專門店