首頁 » 作家投稿 » 生活放輕鬆 » 【濕疹BB】過來人分享，BB濕疹護理、避免方法

【濕疹BB】過來人分享，BB濕疹護理、避免方法

和牛b媽媽 發表於 2018-03-19 
看留言討論

FavoriteLoading收藏文章

天氣係濕疹BB嘅最大敵人，冬天嘅時候超乾燥、而最近又潮濕又熱，都係引發濕疹嘅時候。
 
我哋嘅小寶貝和牛B，一出世嘅時候皮膚好滑，當滿月之後臉頰兩邊就開始出現濕疹。
 
起初我以為係生瘡，就無加以理會，只係用母乳塗上瘡仔部份。
 

 

 
隔咗兩日無好返，所以都係帶和牛B睇西醫，醫生都係斷症為濕疹，開咗類固醇藥適俾我哋。聽到類固醇藥膏，我嗰刻都非常擔心，擔心搽咗之後搞到皮膚薄晒。
 
但係你無辦法唔用，因為母乳咁天然都幫唔到嘅時候，就唯有靠藥物係幫佢好返。
 
薄薄哋跟醫生指示搽，係有少少好轉。大概1-2日，皮膚總算靚返少少。
 
但濕疹皮膚始終不敵天氣，沒有最差，只有更差。每當皮膚好返1-2日，好快又會因為天氣上少少嘅變化，會番發得更加緊要。
 

 
而每次濕疹發作，真係好心痛，但呢個時候就總會有好心人問你BB點解咁，講一啲方案俾你。好感謝你，但唔口唔好再摸我BB塊面，你見到紅晒、標水就唔應該再摸佢，雙手有無數細菌都係會令到BB皮膚更加差，請眼看手勿動!
 

 
濕疹發作，痕癢難奈，令和牛B都瞓得唔好，所以我以前好多時會抱住佢瞓，佢就會瞓得好好。但唔好嘅係，佢伏喺我心口，臉仔又貼住我心口，互相發熱，皮膚都會紅晒。
 

 
一直維持一段時間，不停轉醫生，直至和牛B大概3個月大，朋友介紹一位相熟嘅皮膚科醫生，和牛B嘅濕疹終於得到醫治。
 

 
醫生俾咗唔少建議我哋;
1.夏天都盡量穿著長袖衣物 (尤其係BB)
2.盡量戴上BB手套，以防止抓傷皮膚
3.盡量保持皮膚乾爽 (特別係BB玩口水階段)
4.BB衣物要係純棉質
5.沖涼水溫度不要過熱
6.沖涼時間愈快愈好，因為逗留喺水入面時間愈長，皮膚嘅水份就會流失得愈多
7.沖涼後抹乾八成水份，馬上搽上滋潤嘅Cream
8.避免戶外活動 (長時間喺太陽下)
9.留意室內氣溫，唔可以太熱同埋焗
 
至於飲食方面，醫生話如果BB係食奶粉就要食低敏奶粉。如果媽媽係餵母乳(全母乳)就更加好，咁普遍大家嘅疑問就係，媽媽需唔需要戒口呢?
 

我: BB有濕疹, 我餵母乳需唔需要戒口?

醫生: 除咗魚之外。所有海鮮唔食得，魚要留意返一定要食「咸水魚」。

 

我: 咁牛肉洗唔洗戒?

醫生: 唔需要

 

我: 我鍾意食辣，需唔需要戒?

醫生: 唔需要

 

至於加固方面，醫生亦有提及。要留意有部份食物比較高敏，BB要盡量避免;

BB 1歲半前要盡量避免進食 蕃茄、橙，因為呢兩種食物比較容易出現敏感情況。如果真係想餵BB食生果，食蘋果就一定冇事! 每一種食物，亦最好試足一星期先轉，咁就最安全。當然，如果食咗一次/一日就即刻出現敏感情況，咁就唔好再食。慢慢試，唔好心急，唔好一次過加幾種食材，萬一敏感都唔知係邊一樣食物引致BB敏感。

 
不過濕疹係一個長期戰，醫生都會同你講BB一歲之前因為免疫系統未發育完成，所以係會弱啲，同會持續發作，等到BB一歲之後就會慢慢好返。
 

 
所以為咗唔想俾和牛B抓傷皮膚，我哋當時一直保持要和牛B戴手套戴到差唔多一歲。佢識除，除咗我哋一戴返。試過無戴上手套，和牛B會伸手入件衫袖到，抓到皮膚傷晒，流晒血。
 

 

 
 

仲有就係，我唔建議使用芫茜水 或 金銀菊 抹皮膚。寶寶皮膚較幼嫩，而且每個人嘅膚質都唔同，未必每個人都適合。曾經，和牛B只有3、4個月大時，使用過金銀菊水沖涼，以致皮膚超敏感、皮膚超紅、濕疹更嚴重! 使用前，真係要三思! 

 

**呢張相就係沖過金銀菊浴出事後第二日影嘅相，紅敏依然未退。

 

而家2歲10個月，皮膚已經好好多，就算濕疹發作，都只係好輕微，勤啲搽cream就會好返。不過，濕疹底嘅小朋友搽上身嘅嘢一定要小心選擇，同埋要keep住搽cream。

 

 

————————————————–

歡迎聯絡我&和牛B: [email protected]
Facebook專頁: 和牛B嘅成長專頁

Instagram: wagyubmami

 

 

 

 

 

 

 

 

 

 

 

 

 


————————————————–
姊妹合作**Precious M accessories**
利用剩餘、過期的母乳，自己動手做屬於自己的首飾，母乳媽媽給自己的小獎勵，做法簡單自己都做得到。

關於作者與本篇文章

和牛b媽媽

在職媽媽，分享我的育兒心得、幼兒食譜、假日好去處。喜歡假日帶著和牛b四處遊玩，讀萬本書不如行萬里路。

看作者所有文章

我要回應

我要留言

推薦閱讀