【親子國內旅行】廣洲番禺長隆動物園 + 熊貓酒店 - 簡介

收藏文章

我哋真係好鍾意去動物園、水族館，香港有動物睇嘅地方我哋都已經去過晒。上年我哋亦有帶和牛B出國去咗沖繩嘅美麗海水族館，而和牛B又真係超級開心。

【沖繩親子自駕遊】海洋博公園 x 美麗海水族館 x 好多魚&鯨鯊呀!! (Part I)

不過最近和牛爸公司比較忙，好難放長假，所以我哋就趁住復活節假期，近近地去咗一轉短線國內旅行 – 廣洲番禺2日1夜嘅行程。

而以我所知，廣洲番禺長隆動物園面積好大，如果跟團自有數小時逗留動物園嘅話，相信係行唔晒。所以我哋今次嘅行程就係全部都安排晒喺動物園同埋酒店入面，所以帶住小朋友就可以玩得輕鬆少少。

14隻大熊猫、50隻樹熊、約250隻白老虎，仲有約500隻世界各國嘅國寶級動物、20,000幾隻珍奇動物等等。

出發去旅行前，我有個習慣就係了解當地天氣情況，再預備衣服。

今次出發番禺，都唔例外，我都睇定天氣，就最安全。

好彩嘅旅行期間天氣好好，唔會落雨，不過就有少少熱。

http://www.weather.com.cn/weather/101280102.shtml

而我哋今次嘅行程，買咗套票(酒店、船票同動物園入場券)而餐飲券係分開買嘅。我哋喺中旅社買嘅套票，係包長隆熊貓酒店、來回船票、動物園入場券(2日門券)大概$2707，另外再於長隆嘅官網訂購酒店自助餐嘅票(*因為中旅社唔代訂自助餐券)。

長隆官方網站: https://xzx.chimelong.com/?agent_id=4376

如果用長隆旅遊個手機應用程式，俾錢方面就比較麻煩，因為以支付寶、微信及大陸銀行為主。於官網購買就可以用VISA/ MASTER信用卡俾錢。

自助餐：

兒童身高少於1米免費，兒童票價由1米至1.5米開始計。

早餐及晚餐：

兌返兌返匯率價錢大概HKD153/位大人，一家三口都係HKD306

而晚餐大概HKD295/位大人，一家三口都係HKD589

**於酒店即場預訂自助餐仲有85折，不過如果係旺季，唔知會唔會爆場買唔到自助餐嘅券。

廣州長隆野生動物世界

從熊貓酒店前往動物園，熊貓酒店係有提供免費穿梳巴士，車程大概5分鐘左右。車站位於熊貓酒店嘅對面馬路，遊客可以經天橋或地面過馬路到達。

動物園入場費用：

門票類型	標準票	兒童/長者票	自駕車22座以下（含22座）
價格 (人/車)	平日	特定日	平日	特定日	平日	特定日

RMB￥250	RMB￥300	RMB￥175	RMB￥210	RMB￥250	RMB￥300

*兒童: 身高1米至1.5米

*長者: 65歲或以上及有效証件

出發前往番禺

相信大家都會想知，我哋係點去番禺，要搭幾耐等。其實去番禺可以搭車又或者係船，聽講車都差唔多兩小時，船都係差唔多時間。但係基於和牛B都係接近三歲嘅小朋友，帶寶去旅行最怕就係佢地無耐性坐唔定。所以我哋就揀咗搭船去，再坐接駁巴士入去長隆酒店。因為小朋友坐唔定，搭船都仲可以陪佢行下睇下風景，但係坐車嘅話基本上就真係鬥智鬥力嘅時候。

當日出發搭船，船程大概1:45分鐘。喺蓮花港碼頭落船之後過咗關出閘唔洗1分鐘就行到去接駁車車站，車程大概45分鐘就到達長隆酒店。