收藏文章小JM隨著時間而慢慢成長，當媽既當然開心，但最近小JM每逢見我出門上班都總會哭鬧一番，甚至不願意放手，抓著我不放。
尤其早幾天小JM生病發燒，變得更痴身，只要我消失係小JM既視線範圍內，小JM都會哭過不停，就連去廁所洗手也成問題。。。
見到咁既情況，當媽既何其心痛呢？你話係咪？唔知各位爸B媽咪們又有無同樣既經歷呢？原來小JM以上既行為已經可以稱為 “分離焦慮症” 。
咩係 “分離焦慮症” ？原來 分離焦慮症 （Separation Anxiety) 幾乎每個小B都會有，係情緒發展既必經階段，只係有輕重之分而已。 一般 小B們 到左半歲／7個月左右開始，就會開始意識到媽咪們既存在，漸漸會開始依賴同痴住媽咪們，從而取得安全感。
相反，當小B們發現媽咪突然消失於眼前的話，小B就會表現得不安，煩躁，甚至會哭鬧，但當小B再次見到媽咪返來就會即時笑返晒。如果小B們有以上徵狀，就可能已經有 “分離焦慮症” 啦。
以愛搗蛋愛探索既小JM為例，只要媽咪或爸B係身邊既時候，就會好放心不停四處探索，但當跌到或撞到就會第一時間以目光投向媽咪或爸B以取得關注，或者會爬回媽咪或爸B身邊以取得安慰。又或者如果我突然從小JM視線中離開，小JM就會即時哭鬧，真係想離開一陣都唔易。
DO:
爸B媽咪們，可以透過以下數點來幫助小B們去克服 “分離焦慮症”：
－ 盡量回應小B，以安撫小B既不安情緒
－ 在離開小B前，爸B媽咪們自己都要表現的輕鬆自然，再嘗試係離開前同小B們溫柔咁”Say Goodbye”
－ 多啲同小B玩捉迷藏遊戲，以減低小B對媽咪／爸B突然消失既不安感
－ 轉移小B既視線及注意力
的確，每次出門上班前小JM都總會黏著我好一陣，幸好家中既工人姐姐夠機伶，會幫忙抱開小JM。雖然小JM會哭鬧或者扭計，但我仍會笑住同小JM講：BB，媽咪要出們返工啦，BB要乖乖，媽咪放工就返來陪BB好無？大多數時間小JM都會以一個歡欣既笑容作回答。而我就會笑住慢慢地同小JM講拜拜再出門。（除左病完之後既頭兩日以外，大部份時間而言這個方法都係可行既。）
DON’T:爸B媽咪們係出門／離開小B們之前都要小心留意，千祈唔好因為小B喊而攪到自己都亂晒陣腳，否則小B們就只會更加恐懼同不安；千萬唔好強逼小B分開，或者靜雞雞離開，因為當小B發現既時候就只會更加失落同恐懼分離；切忌以呃得一時得一時既方式去氹小B們，呃呃氹氹越多，小B們對爸B媽咪既信任度就會越低，繼而變得唔再相信爸B媽咪。
所以，無論咩情況都好，爸B媽咪們應該先冷靜自己，再安撫一下小B，等小B冷靜後再用溫柔既語調同小B講你要出門同笑住講bye-bye，相信小B們都會接收到你既”定心丸”既。
題外話：母乳餵哺小B係唔會令小B們變得痴身架，母乳餵哺反而會增進媽咪同小B既親密時間同親子關係，仲會令小B覺得更有安全感添架。
小JM既Facebook Page： 傑。斯 與 晴 （Jolie Babe。小JM の 成長印記）
我要回應