BB睡眠有辦法！？

收藏文章

小JM已經六個月大，自從上星期開始半夜會不停醒來搵奶咀，再安慰自己再訓返，但如果咁岩奶咀並唔係手邊或手仔觸及得到既範圍內既話，小JM就會開始 “求救”，希望爸B同媽咪會係夜?「出手相救」。

遇著半夜小JM求救，媽咪又點會真係就手旁觀（旁睡咋掛？），點都會起身出手幫下小JM，幫佢搵返個奶咀既。

（唔係就會嘈醒埋爸B架啦。。。）但最近小JM半夜醒既情況越來越多，到底點解呢？

為左解開呢個「謎」，我呢位新手媽咪亦上網搵左啲資料睇下，希望了解下係咩原因同時希望幫小JM改善一下睡眠質素。

到底BB們有無特定既「睡眠模式」呢？

其實每個BB都會有唔同既睡眠模式既，而且睡眠模式仲會隨著BB長大而有所改變。（就好似我地大人咁，越大越夜訓囉。。。曳！）

一般而言，BB越大睡眠模式亦會跟著轉變：

(a.) 初生～三個月

。一日大約訓15個鐘左右；但每次可能只會訓 2 至 3個鐘

。每日訓覺既次數不等，因為BB仲係適應期，嘗試適應係母體外既環境，所以小BB訓覺係不分晝夜架！

(b.) 三～六個月

。每日既睡眠時間會少於15個鐘，而且睡眠時間已經明顯比以前長，可以訓到3至4個鐘
。呢個時期既BB已經開始慢慢適應母體外既環境，而且仲開始慢慢會 On Schedule 咁去食同訓添
。BB已經開始習慣左「夜晚要訓」呢個定律，所以夜晚既睡眠時間明顯比日頭長

(c.) 六個月或以上

。每日依然可以訓上十幾個鐘，每次約 3 至 4 小時左右
。BB開始識自己調節睡眠時間
（真正係：一覺訓到大天光！爽呀！）

當然，BB亦會因為某啲既因素而影響到睡眠質素，變到好似小JM咁，半夜醒幾次。。。（唔知係咪吽緊牙仔呢？）另外，原來BB同我地大人係有樣野特別唔同架，就係－－－》BB會越攰越興奮，所以我地唔好係訓覺之前同BB們玩得太過興奮好啲，以免BB夜一夜都唔願訓。

BB們訓得唔好會有咩影響？

大人訓得唔好都會忟憎暴躁，何況係BB們呢？如果你足夠既睡眠同休息既話，BB們都會因此而影響到情緒，會變到好忟憎豬，成日扭計，再者就會影響到BB既食慾、新陳代謝同吸收，咁就會直接影響到BB既成長架啦！相反，BB有充足既睡眠既話，訓醒個刻就當然醒神一啲開心一啲啦！

點先令BB易啲入睡？

由小JM 初生到而家都試過好多種唔同既方法，而且隨著小JM越來越大之後，有啲方法亦好快變得 “唔Work”
1.）用包被包住BB ，增加安全感（札粽咁札）

2.）臨訓前沖涼

3.）沖涼後按摩

4.）沖涼後食奶訓

5）聽住「白嘈音」來訓

6.）較暗啲燈光《－－－（個人認為呢樣好重要，因為要令BB知道日夜）

以上既係小JM 初生到頭兩個月個陣我都試過，但漸漸到小JM大左啲之後，包被同白嘈音已經對小JM無效。。。可能真係越大個越訓得少既關係，小JM而家食完奶反而要玩好一陣先肯訓。。。

以上之中，沖涼來講係對小JM最有效，每次沖完涼，只要帶小JM返房由佢自己碌來碌去一陣就會好快訓著。。。

真係最慳水慳力。

唔知你地既小寶貝又係點入睡架呢？P.S. 我同爸B都係唔主張抱住小JM直到佢入睡，因為我地唔想做左「人肉搖籃」，希望爸B媽咪們同BB一樣有充足既睡眠啦！

最後就等我「開心些牙」小JM與爸B既溫馨片段俾大家睇下～（其實只係爸B幫小JM抹面咋，都唔知點解小JM開心得咁緊要）

小JM既Facebook Page：傑。斯與晴（Jolie Babe。小JM の成長印記）

延伸閱讀：媽媽輕鬆了！寶寶1.5個月就戒夜奶又睡過夜

關於作者與本篇文章

3個追蹤

傑。斯與晴

在職80後情人節媽媽與元宵節寶寶。
新手媽媽細數生活中點滴動人時光，
紀錄及分享育兒小心得、親子旅行及購物分享。
如果有任何查詢/合作想搵我或者Jolie，
歡迎去我們的FB專頁https://www.facebook.com/cjoliema0222/
又或者email到: [email protected]