【媽咪二次懷孕32W】又嚟清胎毒啦！附健康清胎毒糖水食譜參考

踏入孕後期除咗執走佬袋同做孕婦運動，仲有就係準備清胎毒！我上胎大概三十五週開始清，不過食唔到幾次就去咗生bb啦，唔知次數太少關唔關事，上胎我生得好辛苦.. 所以今胎決定早少少食溫和清胎毒糖水，大家有興趣可以參考我既食譜，大部分係屋企都整到，健康少糖版添！

我今胎32週開始食桑寄生蓮子蛋茶、豆腐花同芝麻糊，以下分別講吓每款既內容先。

女性恩物 – 桑寄生蓮子蛋茶，暫時只飲過一次，因為皓皓唔係太適宜飲，所以我比較少煲，不過桑寄生買一次份量都好多，相信都有排煲，甚至生完再可以煲嚟飲！

桑寄生蓮子蛋茶功效：補血，安胎，催乳

食用次數：32週開始一星期一次

食譜連結：懷孕血壓低岩飲！女人恩物！桑寄生雞蛋茶

豆腐花，我建議大家買新鮮每日即製個種，獨立包裝豆腐花食落真係甜啲，我因為擔心妊娠糖尿問題，所以我大多數選擇食每日新鮮街市買個種，糖份量就自己落啦！

豆腐花功效：有膳食纖維防便秘，有大豆卵磷脂可以防塞奶同乳腺炎

食用次數：32週開始一星期一次

芝麻糊，我唔搵都唔知原來芝麻糊都係清胎毒糖水，一般大家會係糖水舖或者買現成一包包即沖嚟食，不過今次我決定係屋企自己整，咁就又低糖又健康啦！

芝麻糊功效：防脫髮烏髮，高纖防便秘，助產

食用次數：33週開始一星期一次

食譜連結：自家製少甜糖水分享！零難度芝麻糊！

其他清胎毒糖水及食物：海帶綠豆沙，腐竹薏米雞蛋薏米糖水，現成椰子水，西瓜等等。

不過海帶綠豆沙同西瓜比較寒涼，所以我未必會食，反而有可能增加返溫和清胎毒糖水次數，大家可以按返自己身體而定啦！