【媽咪二次懷孕35W】無得上孕婦減痛班，上網自學減痛法得唔得？！

不過好可惜宜家無得上，我本身有搵會唔會有人分享上堂內容，不過當然無啦，所以我按佢哋教學內容，自己上網睇吓可以點幫到自己。

首先依個班主張以靜觀訓練，催眠分娩同按摩去減低孕媽咪對分娩既恐懼擔憂，加上生b時面對陣痛會加劇恐怖感，亦會減弱子宮收縮，令產程延長，並產生疼痛，聽落十足十好似我上胎經歷咁！

所以利用靜觀訓練，催眠分娩同按摩，幫孕婦放鬆後，體內釋放止痛、助子宮收縮既荷爾蒙，有助減低生產時間同痛苦！

首先講吓靜觀訓練：對於分娩的壓力同恐懼，有機會令我哋出現唔舒服，好似我就有少少失眠緊張。而靜觀係了解自己出現既即時身體同情緒反應，當下接納情緒，等情緒唔會影響我哋身心再惡化落去，以呼吸或者其他方法將當下注意力放係自己身上，想了解多啲可以睇以下既影片連結。我親身試過靜觀對於日常控制情緒都有幫助，自己更容易察覺情緒上變化，對於教小朋友同其他人相處都有幫助！

另外仲有我搵到其中一位媽咪以靜觀訓練分娩既內容：當出現陣痛就由1、2、3 開始數到10，到陣痛減輕再倒數返轉頭，唔痛就馬上放鬆休息，準備下一輪痛楚，感覺似分散自己注意力去進行減痛。

以下比返YouTube影片大家了解吓係咩先：

靜觀簡介：https://youtu.be/-LHT_2sgMtg

靜觀訓練：https://youtu.be/MoS-CXf1Vh8

催眠分娩：透過催眠冥想等孕媽咪同伴侶肯定孕婦有能力面對分娩過程，簡單講相信自己有能力應付分娩痛楚，依樣除咗產前要催眠，我諗連陣痛時都要做！

按摩：我諗要靠老公陪產時直接問姑娘會比較方便，相信都係其中一種分散注意力既方法。

除咗以上三樣方法，我係YouTube搵到拉梅茲呼吸法，相信都對孕媽咪面對陣痛時都有幫助，所以我都有積極練習中。

拉梅茲呼吸法：https://youtu.be/Uz58NEWlALE

雖然無得上減痛班，不過自己都有努力準備吓，做咗未必一定得，但唔做肯定唔得啦！各位入直路既準媽咪加油呀！