小B口腔護理你要知

收藏文章

小JM轉眼就八個多月啦，眼見小JM成日都”發牙痕”不停拎玩具同用具來咬，雖然未見到有 “牙仔” 既蹤影，但打從小JM細細個開始，我同爸B就已經會為小JM每晚清潔口腔，特別係食完夜奶之後，一定會幫小JM清潔乾淨先一齊訓覺

“口腔護理，從小做起”，我相信類似既說話我地一定聽唔少，但到底要點樣做起呢？不如又一齊研究下，分享下：

如何開始為小B清潔口腔？

其實由小B初出生開始，爸B們／媽咪們就可以定時每晚為小B清潔口腔，開始為小B培養清潔口腔既習慣，到小B出牙仔以後或者學習刷牙都會有一定幫助，更加可以減低小B對刷牙既抗拒感添。

以小JM為例，晚上10點半／11點會食最後一餐奶，而我同爸B會係小JM食完奶後四十五分鐘至一小時左右為小JM進行清潔，再準備訓覺。

清潔既次序如下：
1.）用濕棉／濕紙巾清潔面部，以免有奶漬
2.）用濕棉／紗巾／濕紙巾清潔口腔
3.）換片
完成晒以上所有”程序”之後，小JM就會清楚知道又係時候要訓覺啦。。。之後就緊係一齊訓到大天光啦～

點樣為小B清潔口腔？

係開始為小B清潔口腔前，爸B媽咪記得要先清潔好自己對手呀，以免將污糟野傳左俾小B嘛！

為小B清潔口腔之前，爸B媽咪們需要預備好以下用品：

1.）紗巾／棉

2.）水

當一齊預備好，準備好之後就可以開始為小B清潔口腔啦！

1.）先將預先準備好的紗巾／棉包裹住手指

2.）再放入水中，吸取適量既水份

3.）慢慢引導小B打開口，並將手指伸進小B口腔之內

4.）可以先從上面既牙肉開始清潔，再到下面既牙肉，以打圈方式為小B清潔

咁就為之完成架啦！

或者你會問，如果小B唔肯打開口或者俾小B咬住左手指咁點算？其實都有解決辦法既，唔需要太擔心，（當時我都有問過類似既問題～）

唔開口又點清潔？

其實爸B媽咪係為小B清潔口腔之前唔需要太急進／心急，可以將沾左水既濕棉／紗巾放係小B口邊，慢慢等小B張開口。。。其實呢個原理只係等同餵小B飲奶一樣，當乳頭／奶樽咀靠近個陣，小B們就會好自然以為有野食而張開口等食架啦！

小B咬我手指點算好？

如果係清潔過程中小B真係合埋口或者咬住爸B媽咪手指既話，爸B媽咪記住唔好過於心急扯出手指，以免整傷小B同自己，健康院姑娘教過，如果真係遇到呢個情況，爸B媽咪不彷試下將手指移去咀角位先慢慢拎出手指，又或者唔介意既話，可以繼續為小B清潔，等小B習慣後就會自然張開口架啦！

隨住小B們既長大，爸B媽咪們更加應該為小B們做好清潔口腔同護齒，從而令小B更注重護理口腔發清潔既重要性。而一般小B們會係6-10個月大開始長出牙齒，亦有小B早係4個月都已經出左，原來早同遲都會因為遺傳因素而受到影響，所以出牙既時間都會有唔同既！

點先知小B們係咪準備出牙同可以點幫小B們？

其實想知道小B們係咪準備出牙都可以從小B們既行為而反應出來架，因為出牙仔既時候會令小B們覺得唔舒服，所以爸B媽咪可以係行為上得知既，就好似以下既行為咁：

1.）情緒不安，好容易扭計
－如果小B真係比平時顯得煩躁不安既話，爸B媽咪們就要更加耐心去安撫小B，小B玩下，分散注意力，減輕小B既不安情緒

2.）成日流口水
－呢個時候，爸B媽咪就要出動到「口水肩」啦，仲要記得時不時要換新既口水肩，以保持清潔同衛生

3.）牙肉痕癢不適，成日要搵野咬
－爸B媽咪們可以買一啲牙膠俾小B們咬，來幫助小B們舒緩牙肉既不適

除此之外，爸B媽咪們仲可以買一啲「液體牙膠」俾小B，只要將液體牙膠雪凍就得架啦，液體牙膠會俾傳統牙膠更能有效地為小B們舒緩不適添架。

4.）牙肉腫脹
－如果發現小B們真係牙肉腫脹得很厲害既話，就要盡快帶小B去睇牙醫，了解情況啦

＊＊注意喔＊＊

其實小B們出牙係唔一定會發燒架，小B們之所以會發燒可能係因為出牙既時候亂咬物件而受到細菌感染而造成架，所以爸B媽咪們緊記要每日為小B清潔好玩具同用過既牙膠啦！

當小B們出左牙仔之後，爸B媽咪們可以為小B買一啲專為小B而設既BB牙刷來代替手指進行清潔，亦可以為日後學習刷牙鋪下基礎

小JM既Facebook Page：傑。斯與晴（Jolie Babe。小JM の成長印記）

延伸閱讀：幼兒蛀牙不只牙痛，還會影響腦力發展

關於作者與本篇文章

3個追蹤

傑。斯與晴

在職80後情人節媽媽與元宵節寶寶。
新手媽媽細數生活中點滴動人時光，
紀錄及分享育兒小心得、親子旅行及購物分享。
如果有任何查詢/合作想搵我或者Jolie，
歡迎去我們的FB專頁https://www.facebook.com/cjoliema0222/
又或者email到: [email protected]