【喬喬妹妹養育記0M】產後壓力位！威院產後記！

收藏文章

上回講到我高位穿水入院，之後落催生至生妹妹既經過，今次分享我係威院生完妹妹渡過四日三夜產後醫院生活，經歷過先明白，過來人話係醫院產後房既壓力同痛苦！

 

首先威院係推廣母乳餵哺既醫院，佢哋首要推薦先母乳餵哺，真係唔得再補奶粉，以往聽唔少媽咪講醫院好難比奶粉，不過或者宜家態度改變，佢哋好快肯比，而且仲簡單講吓點開奶，老實講都幾nice。

 

醫院膳食味道我覺得可以，或者可能我本身食得清淡，但係份量完全不足，加上無湯水補充，所以想上奶既媽咪盡量叫屋企人準備平補坐月湯水同一啲有營餸菜會好啲，等身體有足夠營養恢復體力，從而增加奶量都未遲。

 

早餐已經算好好，有時食麥皮都唔知點頂到中午。

 

中午或晚餐，我影出嚟大份，實際份量一般。

 

我今胎去到湊BB真係100%體驗產後房各位媽咪既壓力位，我第一胎餵母乳好順利，本以為今胎實無問題，點知個囡出世後唔願食奶，再加上無間斷兩個鐘喊一次，我完全無得抖，搞到個人都無咩母乳，好彩有一晚姑娘幫手睇咗三個鐘我先有得訓吓。

 

去到第三日以為有得出院之際，喬喬體重比出世時跌咗1成，最後醫生唔比走，個吓我真係精神壓力爆煲喊出嚟，大家可能會話個個生BB都係咁，不過其實我係醫院訓得好差，岩岩生完每日斷斷續續只訓得三四個鐘，搵人幫手睇住BB，但係啲姑娘同醫院嬸嬸無可能無了期幫你，本身諗住返屋企有人幫手，自己先有真休息，咁上奶先更加沒問題，再加上我知大仔皓皓日日係屋企喊住搵我，所以我個吓心情真係跌到谷底。

 

不過之後同老公傾完一輪，我平復心情，最後再聽姑娘講補奶粉比喬喬，去到第四日體重升幅去返合理水平，所以我就急腳腳返屋企啦！！

 

各位千萬唔好睇小產後房新手媽咪受到既壓力，由上奶去到湊BB每一部份都係不停浪接浪，而且疫情期間無得探訪，更加會令媽咪覺得求助無援，壓力爆煲嫁，所以身邊人可以盡力配合同關懷，就算無得探訪都可以準備好新手媽咪需要既用品，等佢可以係產後房都隨手有得用。

 

孕婦湯水分享：

益肺止咳 – 淮山豬展湯

潤肺潤喉 – 蘋果雪梨雪耳潤肺湯

健脾益氣、潤肺 – 北芪黨蔘豬展湯

提升免疫力、補益肝腎！蟲草花雪耳素湯

 

我的第二胎懷孕至分娩經歷

【喬喬妹妹養育記0M】高位穿水！Day2威院15小時生女記

我的第一胎懷孕至分娩經歷

威院分娩記(下篇) 之 二次入院之28小時生仔過程

 

——————————–

唔好錯過我哋親子育兒同每週食譜分享！

快啲like及搶先看我哋專頁！Kylife與二寶之日常

快啲加入懶人食譜Group，齊齊分享！shorturl.at/alLM0

記得追蹤埋我哋IG呀！kylife.babies

———————————